Pinagdududahan ang katapatan ng boyfriend

Dear Maria Angela,

Mahal ko ang aking boyfriend pero nagdududa ako sa kanyang katapatan. Ano ang aking gagawin? – Frida

Frida,

Sigurado naman akong may dahilan ka kung bakit nakakaramdam ka ng pagdududa sa’yong boyfriend. Ano ang dahilan na iyon? Pakaisipin mo.  Talaga nga bang may dahilan para magduda ka sa kanya? Kung may mga kasinungalingan siyang sinasabi sa’yo, may rason nga talaga na pagdudahan mo siya. Kung may iba siyang ka-text, maaari ngang pinagtataksilan ka niya. Kung tunay ka niyang minamahal, sa’yo lang niya dapat ituon ang kanyang atensyon at pagmamahal. Ang tanong, mayroon ba siyang iba? Kung minsan kasi, kahit ipakita sa’yo ng boyfriend mo kung gaano ka niya kamahal, nagdududa ka pa rin sa kanya. Ano ang dahilan? Dahil sa insecurity na iyong nararamdaman. Hindi ko sinasabi na ganito ka nga, siyempre, tanging ikaw ang nakaaalam niyan. Ang ibig ko lang ay sabihin sa’yo ang maaaring dahilan kaya pinagdududahan mo siya. Kung alam mo na mahal na mahal ka niya, maiging magtiwala ka sa kanya. Kung sasabihin mo naman na marami siyang ginagawang kalokohan kaya naghihirapan kang magtiwala sa kanya, mas maigi pa sigurong maghiwalay na lang kayo. Wala naman kasing kuwenta ang relasyon kung hindi na ninyo kayang pagkatiwalaan ang isa’t isa.

Naniniwalang sa lotto aasenso

Dear Maria Angela,

Mahilig akong tumaya sa lotto pero lagi akong natatalo. Hay, hindi ko na tuloy alam kung paano ako aasenso.  – Lazaro

Lazaro,

Ang iyong pag-asenso ay huwag mong iasa sa pagtaya sa lotto. Kung talagang gusto mong umasenso, magtrabaho ka. Mas mabisang solusyon sa kahirapan ang pagbabanat ng buto. Hindi lahat ng tumataya sa lotto ay nananalo kaya huwag mong isipin na baka isang araw ay manalo ka rin sa lotto dahil kung lagi kang aasa, paulit-ulit ka lang mabibigo.  Magtrabaho ka ng umasenso ka, hindi sa lotto, casino o bingo nakasalalay ang iyong pag-asenso. Mas masarap makuha ang mga bagay na gusto mo kapag nanggaling ito sa’yong pagsisikap. Tandaan mo, kahit manalo ka pa ng kung ilang milyon, hindi rin tatagal ang iyong kayamanan kung bulagsak ka at walang hanap-buhay. 

Ang guy o ang tibo?

Dear Maria Angela,

Anim na taon na kami ng karelasyon kong tibo ngunit may karelasyon din akong lalaki, two months pa lang kami. Naguguluhan ako, sino sa kanila ang aking pipiliin? – Abby

Abby,

Ang babae ay inilaan para sa lalaki. Iyon ang dahilan kaya kahit matagal na ang relasyon ninyo ng tibo ay hindi pa rin sapat para siya ang mahalin mo ng lubos. Hindi ko sinasabi ang mga katagang ito dahil inuudyukan kitang ang boyfriend mo ang iyong piliin, ikaw ang makapagdedesisyon noon. Ang nais ko lang ipamulat sa’yo, kahit maayos ang relasyon ninyo noong tibo, iba pa rin ang hahanapin mo. Aasamin mo pa rin na ang kayakap at kahalikan mo ay iyong tunay na lalaki. Patawarin mo ako sa aking sasabihin pero kalimitan, ang mga babaing nakikipagrelasyon sa tibo ay iyong takot masaktan. May mga lalaking papalit-palit ng karelasyon kaya natatakot silang mabigo samantalang kung ang pipiliin nila ay ang tibo, posibleng maging tapat ito sa kanya. Ganoon ka ba? Kung iyon ang layunin mo kaya nakipagrelasyon ka noon sa tibo, makabubuti pang putulin mo na ang relasyon mo sa kanya. Ang tao kasing umiibig ay hindi na iniisip ang damdamin ng iba sapagkat ang tanging mahalaga sa kanya ay ang kanyang damdamin. Kung mahal mo talaga ang karelasyon mong tibo, hindi mo gugustuhing saktan siya subalit nagawa mo na siyang pagtaksilan.

Sinisiraan ng kasambay sa pamilya

Dear Maria Angela,

Itinuring kong kaibigan ang aking kasambahay pero sa huli ay nalaman kong sinisiraan niya ako sa aking pamilya. Payuhan mo ako kung ano ang dapat kong gawin. – Aurora

Aurora,

Kausapin mo siya, sabihin mo sa kanya ang mga nalaman mo. Kailangan lang na maging kalmante ka. Huwag mo siyang pagtataasan ng boses. Ipaalala mo sa kanya ang mga kabutihan na ginawa mo para sa kanya.  Sabihin mong hindi mo iyon sinasabi para sumbatan siya kundi para ipakita sa kanya na hindi mo lang siya itinuring na kasambahay kundi isang kaibigan. Kung may kabutihan na natitira sa kanyang puso, siguradong maaantig ang kanyang kalooban at pagsisisihan niya ang mga bagay na kanyang nagawa. Pero, anu-ano ba ang sinasabi niya sa’yong pamilya? Baka ang sinasabi lang niya ay katotohanan. Huwag mong isipin na kinakampihan ko ang iyong kasambahay. Ang ibig ko lang ay baka nagtatanong lang ang iyong pamilya at sinasagot lang ng iyong kasambahay. Kung may mali kang ginagawa, sana ay magbago ka rin.

May bf si misis na hiwalay sa asawa

Dear Maria Angela,

Tama bang makipagboyfriend ako gayung mayroon akong asawa? Iyon nga lang matagal na kaming hiwalay at mayroon na rin siyang pamilya. – Gwen

Gwen,

Kung mayroon na palang ibang pamilya ang dati mong asawa, mas maigi kung magpa-file ka ng annulment upang tuluyan ka ng makalaya sa kanya. Kahit matagal na kayong hiwalay, hindi ka pa rin lubos na nakakalaya sa kanya dahil  nga may bisa pa ang kasal mo sa dati mong asawa. Kungganoon, mali ang ginagawa mong pakikipagrelasyon. Kaya, sana naman kahit may boyfriend ka, alam mo kung ano ang inyong limitasyon. Hindi porke porke hiwalay ka sa’yong asawa, gagawa ka ng bagay na dudungis sa kanyang pangalan. Kung sakali kasing magbubuntis ka, ikaw ang lalabas na masama. Gusto mo bang pagtsismisan ka? Kung sa palagay mo ay wala kang pakialam sa mga taong may makakating dila, sana naman ay isipin mo ang pamilya mo na maaapektuhan. Kung may anak kayo ng iyong asawa, hindi ba dapat isipin mo rin siya?

Nananakit at naninigaw si Mister

Dear Maria Angela,

Pitong taon na kaming nagsasama ng aking Mister. Kapag nag-aaway kami ay nananakit siya at naninigaw kaya wala na akong ginagawa pagkaraan kundi umiyak. - Jane

Jane,

Hindi mo ba naisip na mali ang ginagawa niya sa’yo. Asawa ka niya kaya dapat lang na igalang ka niya at mahalin. Pero, siyempre mas maigi kung mag-uusap kayo. Sabihin mo sa kanya ang paghihirap na pinagdaraanan mo sa kanyang piling. Kung mahal ka niya, hindi siya magdadalawang-isip na magbago para sa’yo.  Ngunit, paano kung wala siyang balak magbago? Anong gagawin mo, magtitiis ka na lang ba? Sana ay pag-isipan mo ng mabuti ang iyong sasagot. Pirmi mo ring tatandaan na higit kaninuman, kinakailangan mong igalang at mahalin ang iyong sarili dahil kung hindi mo ito gagawin, wala ng ibang gagawa nito.

Bestfriend lang daw pero naging lover

Dear  Maria Angela,

May nangyari na sa amin ng bestfriend ko kahit may bf ako at may gf siya. Sa ngayon ay hindi ko sure kung buntis ako. Sabi naman ng bf ko, tatanggapin niya ang anak ko kahit hindi sa kanya. Ano ba ang aking gagawin? - Claire

Claire,

Kung talagang gusto mong makatiyak na buntis ka, bumili ka ng pregnancy test. Doon ay makikita mo kung buntis ka nga. Kung talagang mahal ka ng boyfriend mo ay magagawa niyang tanggapin ang lahat sa’yo, ngunit, tanungin mo ang iyong sarili, magagawa mo bang ipaako sa kanya ang anak mo sa ibang lalaki? Huwag ka sanang manggamit ng ibang tao para lang maisalba mo ang iyong sarili sa kahihiyan. Kahit mahal ka niya kung hindi mo magagawang ibigay sa kanya ang buo mong pagmamahal at katapatan, balewala ang inyong relasyon. Tingnan mo nga, magkasintahan pa lang kayo pero naging marupok ka na, paano pa kaya kung pakakasalan ka niya? Sana bago ka sumagot ng oo ay pag-isipan mo muna kung bukal ba sa’yong loob ang desisyong ‘yan. Tanungin mo rin sa’yong sarili ang mga katanungang ito. Bakit hinayaan mong may mangyari sa inyo ng bestfriend mo? Mahal mo ba siya? Kung tiyak mo talaga sa’yong sarili na siya ang nilalaman ng iyong puso, makipag-break ka na lang sa bf mo. Kung hindi mo kasi gagawin iyon, sisirain mo lang ang kanyang buhay. Biruin mo sa bawat pagdaan ng araw ay lalo ka lang niyang mamahalin. Ang mabuti pa, tiyakin mo muna sa’yong sarili kung buntis ka at kung sakaling buntis ka nga, kausapin mo muna ang tunay na ama ng iyong magiging anak. Alamin mo kung ano ang kanyang plano. Sana lang ay maging handa ka kung sakaling sabihin niya na iba ang kanyang mahal. Sa ayaw at gusto mo kasi ay kailangan mo itong tanggapin ng bukal sa’yong dibdib. Basta kung sakaling buntis ka, panindigan mo ‘yan. Siguro naman may sapat ka ng kaalaman para mapagtanto mo ang pagkakaiba ng asawa, boyfriend at bestfriend.

Rason kaya nabuo ko ang Dear Maria Angela

Ang ‘DEAR MARIA ANGELA’ ay naisipan kong gawin dahil alam kong maraming teenager na namumublema sa kanilang pamilya, lovelife, barkada at kung anu-ano pa kaya’t naririto ako para mahingan ninyo ng payo.
Alam kong kahit mayroon kayong pamilya at mga kaibigan, may mga bagay pa rin kayong hindi nasasabi sa kanila sapagkat marami kayong pangamba. Kabilang na rito iyong baka hindi nila kayo maunawaan at makarinig lang tayo ng masasakit sa kanila.
Ang DEAR MARIA ANGELA ay naririto upang makapiling mo sa’yong pagdurusa, hinagpis at kalungkutan. Sa lahat ng oras ay maaari mo akong maging karamay at sandigan. Kung ibig mong hingan ako na payo, handa kitang bigyan. Kung minsan kasi, ito lang ang kailangan mo upang malihis ka sa maling landas.
Kung minsan nga, para makatakas ka sa mga problema, mas pinipili mong sumama sa mga maling tao. Kung inaakala mong malulutas ang iyong problema sa pag-inom ng alak o pagdu-droga, nagkakamali ka. Tiyak pang mas lalong lalala ang dinadala mong problema. Kaya, naririto upang ipagbigay alam sa inyo na mayroon pa kayong mapagbabalingan kapag marami na kayong problemang dinadala at kailangan na ninyo itong ilabas.
Hindi ninyo man ako nakikita ng personal, handa akong maging karamay ninyo sa lahat ng oras. Pakikinggan ko ang inyong mga hinaing at asahan ninyong bibigyan ko kayo ng payo. Alam ko kasing ito lamang ang makatutulong sa’yo upang makapag-isip ka at lumuwag ang iyong pakiramdam.
Kailangan mo ng kaibigan, nandito ako.
Kailangan mo ng payo, andito ako.
Sa lahat ng oras ay naririto lamang ako para sa’yo.
Post na ng problema. Agad ko ‘yang sasagutin.
Hintayin ko kayo.


Nagmamahal,
Maria Angela

Happily Married pero mayroon pa ring lover

Dear Maria Angela,
I’m 36 years old, happily married pero may lover ako na may asawa rin. Tama ba ang ginagawa ko? - Tricia

Tricia,
Tatlumpu’t anim na taong gulang ka na kaya dapat ay alam mo na kung tama o mali ang iyong ginagawa. Kunsabagay, may mga taong hindi gaanong iniintindi kung ano ang tama basta ang importante ay masunod ang kanyang gusto. Sa palagay ko’y ganoon ka kaya nakukuha mo pang magtaksil. Sabi mo naman ay happily married ka, kaya labis na nakakapagtaka kung bakit nagawa mo pang magtaksil. Hindi mo ba naisip na may sinumpaan kayo. Saka, maligaya ka ba sa’yong ginagawa? I’m sure hindi. Kung may konsensiya ka kasi tiyak na makakaramdam ka rin ng guilt sa tuwing magtatagpo ang mga mata ninyong mag-asawa. Kungganoon naman pala, sana huwag mo na siyang saktan. Isa pa, pumapasok ka sa magulong sitwasyon. Biruin mo, pareho kayong may asawa pero pareho kayong naglulunoy sa kasalanan. Habang hindi pa huli ang lahat, sana ay itama mo na ang mga pagkakamaling iyong nagawa.

Aso’t pusa ang mag-asawa

Dear Maria Angela,
Lagi kaming nag-aaway ng aking asawa. Bakit nagagawa ko pa rin siyang patawarin sa kabila ng mga kasalanan niya sa akin? - Kristine

Kristine,
Natural lang sa mag-asawa iyong nagkakaroon ng pag-aaway o pagtatalo, kaya huwag kang magtaka kung bakit nagagawa mo siyang patawarin sa kabila ng mga kasalanan niya. O, hindi ba talaga namang mahal mo siya? Iyon ang rason kaya nagagawa mong kalimutan ang kanyang mga kasalanan. Kung sa tingin mo naman ay paulit-ulit na niyang nagagawa ang kasalanan na iyon, siguro naman ay panahon na para mag-usap kayo ng masinsinan. Walang silbi ang pagpapatawad kung hindi bukal sa loob niya ang paghingi ng tawad. Kapag ang isang tao ay nanghingi na ng tawad, dapat lang na hindi na niya gagawin ulit, hindi ba? Mag-usap kayong mag-asawa para magawa ninyong ayusin ang anumang gusot sa inyong pagsasama. Kailangan mo ring itanim sa isipan mo na hindi lang sa kama magtatapos ang pagiging mag-asawa ninyo. Kailangan din siyempreng nirerespeto ninyo ang isa’t isa. Tandaan mo, ang paulit-ulit na pagkakamali ay kawalan ng respeto sa kanyang kapareha.

Maraming manliligaw pero may ibang labs

Dear Maria Angela,
May gusto akong guy kaya lang ‘di puwedeng maging kami. Ang problema ko ay lagi siyang nasa aking isipan. Maraming nanliligaw sa akin ngunit hindi ko gustong magka-boyfriend dahil sa kanya. - Michelle

Michelle,
Kung alam mo palang hindi maaaring maging kayo, pilitin mo na ang sarili mong kalimutan siya. Maaari ngang mahirap gawin iyon subalit iyon ang nararapat para maipagpatuloy mo ang iyong buhay. Kung talagang hindi talaga maaaring maging kayo, isipin mo kung anong rason kung bakit hindi kayo maaaring magkaroon ng happy ending. Kapag naitatak mo sa isipan mo ang dahilan na iyon, mari-realize mo na hindi nga siya dapat mahalin. Kung sinasabi mong may mga manliligaw ka, ibaling mo sa kanila ang iyong atensyon. Hindi ko naman sinasabi sa’yo na sagutin mo ang isa sa kanila kahit hindi mo gusto. Ang sa akin lang, kilalanin mo sila at baka ma-realize mo na isa sa kanila ang maaari mong ibigin. Hindi mo mapagtatanto na walang kapalit ang guy na iyon sa iyong buhay kung hindi mo bibigyan ng pagkakataon ang iyong sarili na kumilala ng iba, hindi ba?

Iniisnab ng boyfriend ang text at tawag

Dear Maria Angela,
Nagsasawa na akong tumawag at magtext sa aking boyfriend dahil hindi siya nagri-reply. Dapat pa ba akong mag-effort para siya’y tawagan at i-text? - Karen


Karen,
Kung hindi ka na niya binibigyan ng pansin, siguro nga mas makabubuti kung huwag mo ng ipagpatuloy pa ang pag-contact sa kanya. Magmumukha ka lang katawa-tawa na naghihintay sa kanyang reply. Maaaring kaya siya hindi nagre-reply sa’yo ay dahil gusto na niyang iparamdam sa’yo na hindi na siya interesado sa inyong relasyon. Pasensiya ka na kung masakit ang aking sinabi subalit pupuwedeng tama ako, hindi ba? Kung talagang mahal ka niya, hindi ka niya siguradong magri-reply man lang siya. Kahit sabihing busy siya, siguradong gagawa siya ng paraan para ma-contact ka. Hmmm, huwag mo na siyang tawagan o i-text. Kung may pagpapahalaga siya sa’yo at sa inyong relasyon, nakasisiguro akong makikipagkomunikasyon siya sa’yo.

Iniwanan ng boyfriend na gustong mag-enjoy sa pagiging single

Dear Maria Angela,
Isang buwan na halos ng makipag-break sa akin ang boyfriend ko dahil gusto raw niyang i-enjoy ang pagiging single niya. Anong gagawin ko? - Wendy


Wendy,
Mas makabubuting mag-move on ka na. Sa ngayon ay mahirap sa’yong gawin iyon dahil mahal mo pa siya ngunit, tiyak sa paglipas ng araw ay malilimutan mo rin siya. Ang kailangan mo lang gawin ay burahin siya sa’yong alaala. Ngunit hindi ka magtatagumpay layuning ito kung lagi mo pa rin siyang iisipin kaya makabubuting itago mo na ang mga bagay na makapagpapaalala pa sa pagmamahalan ninyo. Mas maiging ibaling mo na lang ang pansin mo sa ibang bagay, tulad ng iyong pagtatrabaho o hindi kaya’y sa pag-aaral. Pero sana rin isipin mo ang rason kaya nagpasya siyang wakasan ang inyong relasyon. Dahil nga ba hindi ka na niya mahal o dahil nasasakal na siya sa’yo? Kung alam mong selosa ka, maaaring iyon ang rason kung bakit iniwanan ka niya. Wala ka ng magagawa pa para ayusin mo ang inyong relasyon kung matibay na ang desisyon niyang iwanan ka. Ang gawin mo na lang ay itama mo ang mali mong ugali para sa susunod na magka-boyfriend ka ay hindi na magdedesisyong makipag-break sa’yo.

Afraid sa ex-girlfriend ng boyfriend

Dear Maria Angela,
Nabalitaan kong uuwi ang ex-gf ng bf ko. Natatakot akongmagkita sila dahil baka matuklasan nilang mahal pa rin nila ang isa’t isa. Ano ang aking gagawin? - Fhaye

Fhaye,
Teka nga muna, bakit ba natatakot ka ng ganyan, eh, matagal na namang tapos ang kanilang relasyon? Wala ka bang tiwala sa’yong boyfriend? Hindi mo ba nararamdaman ang kanyang pagmamahal? O nai-insecure ka lang? Kung talagang mahal mo ang iyong boyfriend, dapat lamang na pagkatiwalaan mo siya. Kung hindi mo ito gagawin, pirming kang matatakot. Gusto mo ba iyon? Siguro naman ay hindi ka manhid para hindi mo maramdaman ang kanyang pagmamahal. Kung nararamdaman mo ang kanyang pagmamahal, pagkatiwalaan mo siya. Sige ka, baka magkalamat ang inyong relasyon. Hindi dahil sa pagbabalik ng kanyang ex kundi sa kawalan mo ng tiwala sa kanya. Kung ramdam mong kulang ang pagmamahal niya sa’yo, makipag-break ka na sa kanya. Oo nga mahirap makipaghiwalay, lalo na kung mahal na mahal mo siya ngunit, kailangan mo ring protektahan ang iyong sarili upang hindi ka na masaktan pa. Higit kaninuman, mas mahalin mo ang iyong sarili. Mag-usap rin kayo ng iyong bf. Itanong mo sa kanya kung tunay ba ang pagmamahal niya sa’yo. Kapag hindi siya makatingin ng diretso sa’yong mga mata, ibig sabihin ay hindi siya sigurado sa’yong damdamin ngunit kung nagagawa naman niyang bigkasin ang mga katagang mahal kita habang nakatitig sa’yong mga mata, dapat lang sigurong pagkatiwalaan mo siya.

Sinungaling ang boyfriend

Dear Maria Angela,
Dapat ko pa bang pakisamahan ang boyfriend kong sinungaling? Kahit nahuli na, siya pa ang nagagalit. Ano po ang dapat kong gawin? - Aiza

Aiza,
Reverse psychology ang kanyang ginagawa kaya ipinapakita niyang nagagalit siya kapag sinisita mo. Kung hindi kasi niya gagawin iyon, siguradong tuluyan mo na siyang mabubuking. O, hindi ba kapag sinisita mo siya ay gumagawa siya ng ibang bagay na pag-aawayan ninyo. Ang dahilan, ayaw niyang matuon ang iyong atensyon sa kasalanang nagawa niya sa’yo. Ikaw naman, huwag kang magpapadala sa drama niya. Kung mayroon siyang kasalanan sa’yo, sabihin mo. Kung niloloko ka niya, bakit nagtitiyaga ka pa sa kanyang piling. Huwag mong sasabihing dahil mahal mo siya, hah. Bago ka magmahal ng ibang tao. Kailangan mo munang mahalin ang iyong sarili. Huwag mong hayaang saktan ng ibang tao para naman irespeto ka. Kung makikita kasi ng boyfriend mo na parang okay lang sa’yo na niloloko ka, uulit-ulitin niya iyan. Gusto mo ba iyon? Sige ka, baka kapag nasanay ‘yan ay tuluyan na siyang mawala sa’yo. Kailangan mo rin namang panindigan ang galit mo. Awayin mo siya para naman Makita rin niya kung gaano siya kaimportante sa’yo sapagkat nagagawa mo siyang ipaglaban. Ngayon kung hindi naman niya pinahahalagahan ang iyong pagmamahal, makipag-break ka na lang sa kanya. Sigurado kasing hindi rin naman mauuwi sa happy ending ang inyong relasyon. Kung talaga kasing mahal ka niya, hindi ka niya sasaktan. Kaya, sana naman ay mag-isip-isip ka na. Tandaan mo rin, walang silbi ang inyong relasyon kung hindi naman niya makuhang maging tapat sa’yo.